Amnesty raporta xwe ya Rojava û Efrînê belav kir
Di raporta Rêxistina Lêborînê ya Navdewletî de tê gotin ku di êrîşa Tirkiyê bo ser Serê Kaniyê û Girê Spî de 180 sivîlan canê xwe ji dest dane.
Rêxistina Lêborînê ya Navdewletî (Amnesty International) di raporta xwe ya salane de ragihandiye ku di êrîşa Tirkiyê ya 9ê Cotmeha 2019an bo ser Serê Kaniyê û Girê Spî yên Rojavayê Kurdistanê de 180 sivîlan canê xwe ji dest dane.
Herwiha tê gotin ku grûpên çekdar ên Tirkiye piştgiriya wan dike, bê ferq û cudahî saziyên hikûmî, dibistan, firne û cihên sivîlan dikin armanc.
Rêxistina Lêborînê di beşa “Revandin û kuştinan” a raportê de, behsa kuştina Siyasetmedara Kurd û Seroka Partiya Sûriya Pêşerojê Hevrîn Xelef dike ku roja 12.10.2019an li ser rêya navbera Til Temir û Eyn Îsa ji aliyê çekdarên Ehrar El Şerqiye ve hatibû kuştin.
Herwiha di raportê de behsa Efrînê jî tê kirin ku di 18ê Adara 2018 de Tirkiye û “Artêşa Azad a Sûriyê” ew xistine jêr kontrola xwe û dibêje, Tirkiyê rê daye grûpên çekdar ku nehêlin xelk vegerin malên xwe, dest deynin ser malên sivîlan û hinek mal jî wek baregahên leşkerî tên bikaranîn.
Rêxistina Lêborînê ya Navdewletî daneyê Komîteya Lêkolînan a Neteweyên Yekbûyî jî piştrast dike ku li Efrînê sivîl bo fîdyeyê tên revandin û sivîlên daxwaza mal û milkên xwe jî dikin bi tohmeta endamê Hêzên Sûriyeya Demokratîk in tên revandin.
RÛDAW