Çavkaniyên Amerîkî: Ebûbekir Bexdadî hat kuştin

Çavkaniyên medyayê behsa wê yekê dikin ku qaşo Wezareta Berevaniyê ya Amerîkayê ji Koşka Spî re ‎ragihandiye ku di operasyoneke gelekî taybet a Amerîkayê de li Idlibê, Bexdadî hatiye kuştin. Trump jî ‎di Twittekê de nivîsiye: “Her niha tiştekî gelekî mezin qewîmî.” Gumana wê yekê ji Twîtta Trump tê ‎kirin ku bi kuştina Bexdadî ve girêdayî be.‎

Çavkaniyên medyayê dibêjin, hefteya derbasbûyî Trump îmze li ser pêkanîna operasyoneke gelekî ‎taybet kiriye, yekeyeke taybet a Amerîkayê di operasyoneke taybet de, bi ser wî cihî de girtine ku ‎Bexdadî û jin û zarokên wî têde bûn. Navê cih Barîşa ye li parêzgeha Idlibê, li ser sînorê navbera Sûriye ‎û Tirkiyê 5 kîlometre dûrî bajarê Hatayê yê Tirkiyê.‎

Li gor çavkaniyan, operasyon bi helîkopterê hatiye kirin û dema hêza taybet a Amerîkayê digihin mala ‎Bexdadî, hinekî şer derdikeve û piştre bi gotina wan çavkaniyan, Bexdadî û herdu jinên wî tên kuştin. ‎Hinek çavkanî jî qala wê yekê dikin ku qaşo berî Bexdadî were girtin, xwe diteqîne.‎

Çavkaniyeke din: Bexdadî xwe teqandiye

Dema nûçeya kuştina Bexdadî belav bû, Îranê yekser ragihand ku zêdeyî hefteyekê ye ew bi rêya ‎hikûmeta Sûriyê derbarê cihê mana Bexdadî de hatine agahdarkirin û mijûlê komkirina zanyariyên ‎zêdetir ên derbarê wê mijarê de bûn.‎

Hewla kuştina Bexdadî di demekê de ye, Trump la nav welatê xwe rûbirûyê du guşarên mezin bûye, ‎biryara vekişandina hêzên Amerîkayê ji Rojavayê Kurdistanê ku rexneyên dijwar ên Kongresê bi pey ‎xwe anîn û herwiha guşara Kongresê ya lêpirsîna derbarê Trump de li ser peywendiya ligel Serokê ‎Ukraynayê.

RÛDAW