PAK:Armanca Dewleta Tirkîyeyê dagirkerî û jenosîd e

Dewleta Tirkîyeyê bi navê ‘Kanîya Aşitîyê’ êrîş li ser Rojavayê Kurdistanê destpê kir. Armanca Dewleta Tirkîyeyê dagirkerî, qetlîam, guherandina demografîyayê, perçe kirina axa Rojavayê Kurdistanê ye, jenosîd e.

Ev êrîş xeterîyeke mezin e li ser paşaroja gelê me û welatê me.

Em vê êrîşê bi tu awayî qebûl nakin, şermezar dikin.

Divê TEVDEM, PYD, ENKS û hemû alîyên sîyasî yên Rojavayê Kurdistanê demildest bêne cem hev û li ser hişmendîya Mitabaqatên Hewlêr û Dihokê sîyaset û nexşe rêyeke hevbeş tesbît bikin. Ji bo parastin û paşeroja gelê me û welatê me, gava yekem divê ev be.

Fransa û Îngîltere bangî Konseya Ewlekarîyê ya Netewên Yekbûyî kirine da ku vê êrîşa Dewleta Tirkîyeyê biaxivin. Ev gaveke erênî ye.Lê em dîsa bangî UN, Yekitîya Ewrûpa, Emerîka, Rûsya, Yekitîya Dewletên Ereban û hemû dewletên cîhanê dikin da ku bila van êrîşên Dewleta Tirkîyeyê bidine rawestandin. Bila dinya nebe şirîkê vê êrîşa dagirker ku dixwaze jenosîda gelê Kurd pêk bîne.

Hemû partî û rêxistinên Kurd û Kurdistanî yên li her çar parçeyên Kurdistanê divê bi helwesteke hevbeş li himberî vê êrîşa hovane rawestin. Roj roja yekgirtineke netewî û niştimanî ye.

Dewleta Tirkîyeyê jî divê bizanibe ku bi kuştin û dagir kirin û jenosîdan gelê Kurd jî doza azadîya Kurdistanê jî ji holê ranabe. Demildest divê ev êrîş bêne rawestandin.

10.10.2019

Buroya Çapemenî û Ragehandinê ya PAKê

Kaynak: PAK:Armanca Dewleta Tirkîyeyê dagirkerî û jenosîd e

Rûpela nû