Kurdên Rojava ji destûra nû bêhêvî ne

September 20, 2019

Di nav kolana Rojavayê Kurdistanê de xelk derbarê komîteya nivîsandina destûra nû ya Sûriyê de dibêjin, hejmara Kurdan di nava wê komîteyê de pir kêm e û ji bicihkirina mafên pêkhateya Kurd weke netew di destûra nû de bêhêvî ne.

Nivîsandina destûra nû ya Sûriyê, derbasî qonaxeke nû dibe. Rûsya û Tirkiye û Netewên Yekbûyî bi awayekî destpêkî li ser navên endaman rêkevtin û di demeke nêzîk de komîte tê avakirin.

Xebat û hewldanên ji bo nivîsandina destûrekî nû bo Sûriyê, di nava raya giştî û xelkê Rojavayê Kurdistanê de, nerînên cuda bi xwe re aniye.

Welatî dibêjin, ti kes û aliyek îtîrafê bi mafê Kurd nake, Kurd bi xwe jî lihev nakin û parçekirî ne.

Xalib Sadûn yek ji nîştecihên bajarê Qamişlo dibêje, dema ku 150 kes li ser mijara destûra nû ya Sûriyê bicivin, divê mafên hemû pêkhateyan li ber çav bigirin û mafên wan bêne dabînkirin, bi taybet jî mafên pêkhateya Kurd, ku pêkhateya herî mezlûm e li Sûriyê.

Xalib Sadûn herwiha dibêje, “çênabe ku destûrek nû ji bo Sûriyê bê nivîsandin û têde mafên Kurdan û herwiha her pêkhateyek din were paşguhxistin.”

Sadûn amaje bi giringiya yekbûn û yekdengiya aliyên Kurdî kir û got, tişta herî sereke û giring ev e ku “Kurd yekgirtî û yekdeng bin û daxwaza wan jî yek be” û nabe nakokî di daxwaziyên aliyên Kurdî de hebe.

Çalakvana Kurd, Şeha Ebdulrehman jî nerîna xwe li ser hewlên ji bo amadekirina destûra nû ya Sûriyê ji Rûdawê re tîne ziman û dibêje, ti baweriya wê bi wan hewldanan û herwiha garantîkirina mafên Kurdên Rojavayê Kurdistanê di destûra nû de nîne û dibêje, tenê du nûnerên Kurd di komîteya amadekirina destûrê de cih digirin.

Şeha Ebdulrehman got: “Ji 150 kesan tenê 2 kes Kurd in, em dê çi hêviyekê lê  bikin. Gerek bi kêmanî 20-25 heta 30 kesan ban, bi rastî baweriya min pê nayê.”

Semîr Hesen welatiyekî din ê Qamişloyê ye û ew jî ji bicihbûna mafên Kurdên Rojavayê Kurdistanê di destûra nû de bêhêvî ye. Semîr Hesen dibêje, rejîma Sûriyê tiştekî nade Kurdan û hêj heta niha jî îtîrafê bi kurdan nake.

Birahîm Mihemed jî bêhêvîbûna xwe ji dayîna mafên Kurdan di destûra nû de tîne ziman û tekez dike, dema ku ne opozsiyona derve û ne jî opozisyona navxwe ya Sûriyê îtîrafê bi mafên Kurdan nakin, dê çawan mafên Kurdan hebe.

Bi gotina wî welatiyê Rojavayê Kurdistanê, hêj li Sûriyê rewş aloz e û grûpên çekdar hene û şer berdewam e û destnîşan kir, ji bo ku destûrek nû were amadekirin, pêwîst e rewş li Sûriyê bi giştî aram be

RÛDAW

 

Please reload