Li Bakûrê Kurdistan û Tirkiyê sala nû ya xwendinê dest pê dike

Li Bakûrê Kurdistan û Tirkiyê, sala nû ya xwendinê dest pê dike. Îsal jî weke salên berê, wê zarok li Bakurê Kurdistanê, ne bi zimanê Kurdî lê belê bi zimanê Tirkî bixwînin.

Sala xwendinê ya 2019-2020 li gorî plana Wezareta Perwerdehiyê ya Tirkiyê, îro Duşemê dest pê dike. 17ê Çileyê sala 2020an, werzê yekemîn temam dibe û bêhnvedana nîvê salê dest pê dike ku 16 roj in.

Roja 3ê Sibata 2020an, werzê duyem dest pê dike û 19ê Hezîrana 2020an dawî li sala xwendinê ya 2019-2020an tê.

Li gor amarên Wezareta Perwerdehiyê ya Tirkiyê bo sala 2019-2020, hejmara xwendevanan li Bakûrê Kurdistan û Tirkiyê li seretayî, navendî û amade yî de 18 milyon û 108 hezar û 860 xwendevan in. Ji xwendekaran 9 milyon û 394 hezar û 125 kur û 8 milyon û 714 hezar û 735 keç in.

Bakûrê Kurdistanê û Tirkiyê di sala nû ya xwendinê de jî 1 milyon û 77 hezar û 307 mamoste dê waneyan vebêjin ku 907 hezar û 567 ji wan li dibistanên hikûmî ne û 169 hezar û 740 li dibistanên taybet in.

Herwiha hejmara dibistanan li Bakûr û Tirkiyê digihije 66 hezar û 849an.

RÛDAW