Koşka Spî: 200 leşkerên Amerîkayê li Sûriyê dimînin

Koşka Spî ragihand, Amerîka dê leşkerên xwe ji Sûriyê vekişîne, lê belê dê 200 leşkerên xwe ji bo parastina aştiyê li nav axa Sûriyê bihêle.

Berdevka Koşka Spî Sarah Sanders, piştî hevdîtina telefonî ya Serokê Amerîkayê Donald Trump û Serokomarê Tirkiyê Recep Tayyip Erdogan, di derbarê pêvajoya vekişîna leşkerên Amerîkayê ya ji Sûriyê daxuyaniyek da.

Sanders got: “Dê komeke piçûk a nêzîkî 200 leşkerên Amerîkî, di çarçoveya erka parastina aştiyê de, demeke din jî li Sûriyê bimîne.”

Sanders, di derbarê hûrgiliyên vekişîna leşkerî û mana 200 leşkerên wî welatî li Sûriyê de ti agahiyên din neda.

Şeva bihorî jî Donald Trump û Serokomarê Tirkiyê Recep Tayyip Erdogan pêwendiyeke telefonî encam dane û di vê pêwendiyê de derbarê rewşa Sûriyê, vekişîna hêzên Amerîka ji Sûriyê û pêkanîna Herêma Aram li Sûriyê de gotûbêj kirine.

Serokê Amerîkayê Donald Trump, di meha Kanûna 2018an de ragihandibû ku DAIŞ li Sûriyê, li ber qediyanê ye û êdî dê Amerîka leşkerên xwe ji Sûriyê vekişîne.

Di destpêkê de Trump dema 60 rojan bo vekişandina hêzên Amerîkî ji Sûriyê destnîşan kiribû, lê belê zêdetirî 3 mehan bi ser biryara wî re derbas bûye û hêj leşkerên Amerîkayê ji Sûriye nehatine vekişandin.

Biryara Trump a derbarê vekişîna leşkerî ya ji Sûriyê de, him li nav Amerîkayê û him jî li cîhanê rastî nerazîbûnên mezin hatibû û Wezîrê Berevaniyê James Mattis û Nûnerê Amerîka di Hvepeymaniya Navdewletiya Dijî DAIŞê de Brett McGurk weke nerazîbûn, dest ji kar berdabûn.

RÛDAW