Search
  • www.bircabelek.com

PAK: Tu kes dê nikaribe îradeya ‘belê’ ya referandûma serxwebûnê tune bihesibîne


PAK (Partîya Azadîya Kurdistanê) jiber 3yemîn salvegera biryardayîna referandûma serxwebûnê daxuyanîyek belav kir.

Daxuyanîya PAKê wiha ye:

Îro 3yemîn salvegera biryardayîna referandûma serxwebûne ye.

Di Roja 7ê Hezîrana 2017an de , partîyên sîyasî yên Başûrê Kurdistanê bi serpereştîya Serok Mesud Barzanî civîyan û biryara referanduma serxwebûnê dan.

Dewletên mezin ên cîhanê ne dixwestin referandûm li dar bikeve.

Dewletên wek Iraqê, Îranê, Tirkîyeyê, Sûriyeyê jibo ku referandûm li dar nekeve çi ji destê wan hat kirin.

Lê li gel van hemû êrîş û tehdît û plan û hewlên xêrnexwazan jî referandûma serxwebûnê di roja 25ê Îlona 2017an de li dar ket.

Li temama Başurê Kurdistanê; li Hewlêrê, li Silêmanîye, Kerkûk, Dihok, Helebçe, Şingal, Xaneqîn, Deşta Mûsilê ji %72yê gelê Başûrê Kurdistanê beşdarî dengdana referandûma serxwebûnê bûn. Û ji %92.73yê beşdaran ji serxwebûnê re gotin ‘belê’.

Biryara referandûma serxwebûnê li Parlamentoya Kurdistanê bi awayekî demokratîk, meşrû hate girtin.

Prosedura referandûma serxwebûnê bi aramî, bi şêweyeke demokratîk bi rêv çû.

Encamên referandûma serxwebûnê nîşana yekgirtineke berfireh a netewî, niştimanî ya gelê Kurdistanê bû.

Gelê Başûrê Kurdistanê bêyî tirs, bi îradeyeke bêşik ji xêrnexwazan re, ji temama cîhanê re got ‘ez li gel serxwebûnê me’.

Di 16yê cotmeha 2017an de Kerkûk û Şingal û ji %45ê axa Başûrê Kurdistanê dubare hatin dagirkirin. Ev êrîş û dagirkirina di roja 16yê cotmehê de pêk hat, binpê kirin û tune hesibandina wê îradeya gelê Kurdistanê ya di referandûma serxwebûnê de bû.

Lê biryara Parlamentoya Kurdistanê ya jibo referandûma serxwebûnê jî, ji %92.73yê ‘belê’ ya referandûma serxwebunê jî di rûpelên dîrokê de wek du biryar û encamên meşrû û demokratîk cîhekî xwe yê bi rûmet girtine.

Tu kes û tu hêz dê bi tu awayî nikaribin van herdu gavên ku îradeya gele Başûrê Kurdistanê dîyar dikin, ji nav rûpelê dîrokê reş bikin., dê nikaribin wan tune bihesibînin.

Ew kilîda ku derîyê paşeroja Başûrê Kurdistanê vedike her di dest û dilê wî gelê bi rûmet de ye.

Em di 3yemîn salvegera biryara referandûma serxwebûnê de, bi rêzdarî , bi can û dil li îradeya gelê Başûrê Kurdistanê ya ‘belê’ ya serxwebûnê xwedî derdikevin, piştgirîya wan dikin.

07.06.2020

Buroya Çapemenî û Ragehandinê ya PAKê

Kaynak: PAK: Tu kes dê nikaribe îradeya ‘belê’ ya referandûma serxwebûnê tune bihesibîne

Rûpela nû

4 views